Skapandi náttúrugöngur út frá umhverfisvænu sjónarhorni (LHI-BJB-04-IS)

Skapandi náttúrugöngur út frá umhverfisvænu sjónarhorni

Einstaklingsvinna, skoðunarferð

Gagnlegt að hafa margs konar föndurefni eins og skæri, mismunandi tegundir af pappír, límband, þráð og lím. Myndavél eða sími til að taka myndir. Minnisbók eða skissubók og skriffæri.

Safna ýmsum gögnum og nota það sem til er

Einstaklingsbundið

Það er mikilvægt að gera sér grein fyrir að með einbeitingu, athygli og tíma skilar verkefnið bestum árangri.

The Mushroom at the End of the World - Anna Lowenhaupt Tsing

Braiding Sweetgrass - Robin Wall Kimmerer

www.materiom.org

Í lok þessarar æfingar eiga einstaklingar að:

• hafa aukið vitund sína og tengingu við umhverfið,
• hafa þróað sitt eigið vinnuferli,
• hafa þjálfað skynjun á hlutum í umhverfi sínu,
• hafa gert sér grein fyrir að smáir hlutir geta skipt máli við listsköpun.

Meginmarkmið þessa verkefnis er að fræða einstaklinga um það hvernig skoða má nærumhverfið út frá umhverfissjónarmiðum og finna útgangspunkta að nýjum hugmyndum í eigin listsköpun. Framkvæmdu eftirfarandi skref:

1. Farðu í göngutúr í nærumhverfi þínu eða á stað sem þér þykir áhugaverður.
2. Á meðan þú gengur skaltu taka vel eftir því sem er í kringum þig og fylgjast með því sem þú skynjar. Framkvæmdu þetta með opnum huga án þess að meta það sem þú sérð sem jákvætt eða neikvætt. Er ofgnótt af einhverju? Hverju er ofaukið og hvað er sjaldgæft? Hvaða efni eru í umhverfi þínu og hverjir eru eiginleikar þess? Hefur umhverfið einhverja heildarmynd og hvaða áhrif hefur sú heildarmynd á þig og þína skynjun?
3. Safnaðu sýnum eða hlutum, teiknaðu skissur, taktu ljósmyndir, skrifaðu niður hugsanir, stikkorð og tengingar. Áður en eitthvað er fjarlægt úr umhverfinu, vinsamlegast íhugaðu afleiðingar þess og hvort það hafi varanleg áhrif á umhverfið. Ef svo er, er gott að skrá niður hugsanir þínar eða orð í staðinn, það getur hjálpað við að þróa hugmyndir og auka tengsl við viðkvæma náttúru.
4. Þú gætir viljað endurtaka þetta ferli oftar en einu sinni til að kortleggja nærumhverfi þitt. Hugaðu að tengslum milli mismunandi þátta vistkerfisins, jafnvel þeirra sem eru af mannavöldum og ekki náttúrulegir, svo sem hvers kyns úrgangur, steinsteypa og málmhlutir. Er jafnvægi milli þess manngerða í  umhverfinu og náttúrunnar. Er eitthvert ójafnvægi sem þessu fylgir? Hvaða tilgangur hefur umhverfinu verið gefinn og hvert er eiginlegt hlutverk umhverfisþátta til að byrja með? Taktu eftir þáttum eins og veðri, vindum, loftgæðum o.s.frv.
5. Skissur og glósur, myndir og sýni eru skoðuð, endurunnin og prófuð með tilliti til mismunandi tækni, bæði í tvívíðu formi (skissur, teikningar, klippimyndir, stafrænt o.s.frv.) eða þrívíðu formi (skúlptúrar, líkön, prufur o.s.frv.). Mikilvægt er að endurvinna sýnin með opnum huga og hjálplegt að skoða vinnsluaðferðir sem til eru nú þegar og hafa þær til hliðsjónar.  Er hægt að breyta einhverju? Á að breyta því? Hvaða áhrif hefur það á náttúruna og heild umhverfisins? Prófaðu hugmyndir þínar án væntinga um endanlega niðurstöðu. Það getur verið gagnlegt að halda utan um ferlið þitt og skrá niður hugmyndirnar sem koma fram.
6. Nú þegar þú hefur gert tilraunir og kynnst því hvað er í umhverfinu skaltu íhuga hugsanlega notkun þína á því sem þar er. Ef þú skoðar stærra svæði;  Hvar er auðn? Hvar er ofgnótt? Eru veikir og sterkir punktar þar sem hægt væri að stuðla að betra jafnvægi milli manns og náttúru? Það er ekki einfalt að leggja mat á áhrif manns á umhverfið. Síðasta skrefið í þessari æfingu er að huga að fyrirætlunum þínum og mögulegum ávinningi af gagnkvæmu sambandi milli manna og náttúru. Notaðu þessa æfingu sem spegilmynd af iðkun þinni og því hlutverki sem þú tekur að þér í umhverfi þínu. Þessi æfing getur verið mikilvægt ferli fyrir framtíðarvinnu og hugmynd um hvar og hvernig þú vilt staðsetja þig og þitt hlutverk í sambandi við lífríkið.

Þeir sem vilja fá frekari upplýsingar, vinsamlega hafið samband við hönnuð þessarar æfingar, Sólrúnu Arnarsdóttur.

Sólrún Arnarsdóttir

https://solrunarnarsdottir.myportfolio.com/

Research blog for university project https://solarnar.wixsite.com/mysite

Email: solarnar@gmail.com

 Sólrún Arnarsdóttir er efnis- og textílhönnuður og stundar nám í Central Saint Martins í London, með grunnnám í málaralist og skúlptúr frá Camberwell College of Art. Skúlptúrar hennar hafa verið sýndir í London og á POST-2018 tískusýningunni á vegum Goldsmiths Fashion Society. Viðfangsefni Sólrúnar snúast um tengsl mannsins við jörðina og hvernig upplifun mannsins verður fyrir áhrifum frá umhverfinu og öfugt. Sólrún er hugfangin af því sem lýtur að ringulreið og glötun en gefur tækifæri til íhugunar, sjálfsathugunar og þroska. Það er markmið hennar að hvetja til breytinga í átt að betri framtíð með því að endurskoða umhverfið og hegðun mannsins í samræmi við grunngildi um gagnkvæma virðingu. Breytingar eru óhjákvæmilegar og hugsanlega styður vitund og breytt sýn leiðina að fjölbreyttum en samræmdum vistkerfum manns og lífríkis. Sólrúnu finnst gaman að lesa í umhverfið og skilja það í gegnum reynslu og skynjun, sem hefur hvatt hana til skapandi hugsana og flæðis, með forvitni og framtíðarsýn að leiðarljósi. Kunnuglegur hlutur tekinn úr samhengi sínu, einangruð smáatriði og breytt skynjun t.d. með stækkun, litum, formi, ljósi eða skugga, fanga athygli Sólrúnar. Hún rannsakar nú sjálfræktað lífefni í víðara samhengi með áherslu á ný og bætt kerfi.

Þverfaglegar listgreinar og hönnun

Enska, Íslenska